I noćas me
vino vodi u sanj
kadi si tu,
i ja i brige
za »tuje« stvari,
vrata zaprit?
već otprit
kako kračunon?
raskračunat,
ki drage ruke zdire,
z ognjice zbudjena
tvojima besidami
moje zlatne
su š njima procvitale
zate, zate,
voli hi
kako ča ja
ljubin tebe iiiii?
biš li da ustanen?
ZAVEĆANJE
Zrušila se gradina
zletili dimi zgorun
zuz grede nevidne
otprto svitli
vrh neba,
naspored zida ugnjišća
žerava u popelu
za jutro čeka
ruke duš
ke staknut će nas
joped,
na to smo se
zavećali
smo, smo,
smo pitaj andjele...
PIŠE
Z duše
zresla si mi roža
a ja
nis lovac,
ni ukodlak
samo
teplinje željna iskra
tvoga ognja
nezgorenega
ti ljubljenja,
sve je to
zapišeno
KAPLJA SPAMETI
Tvoje se veselje utopilo
u čaši besid
stečenih
kako kaplje
žljuknjene bilice
cideć crvenilo
gustinon ulja ulike,
spuškali su
piski roženic
i proškripljali
kako zgoreni glasi,
sve se zljutilo,
zvidašilo
zamukle roženice,
a z prazne boce
vapi molitva duše
za oprost.
ULIKA
Pod ulikon Ulika
suru krunicu prebiruć,
ćuti se kako divojčica.
BUDI TU
Večeras mi se ne spi
a oči išću sanje
sluša mi se
ritko čujenih zdihi
tamo zgora
kadi ti duša
u molitvah šeće,
ja san uni
ki te u kruni
samo ustani,
samo ustani...
KORAK U MISTU
Srića
ča je od neba došla
donesla je dušu
tvoga imena
i stisla me use
kroz tvoj govor
zalivenega cvića,
jedan kup
zdija je kopu
spod ke
zbudila si mi življenje,
kako korenjen ulike
uvezala, spjevala, splesala,
sveno jena nesušna
ustala je suza
ni z sanja ne pušćaš me
h sebi eli h meni,
kud naprid, kamo
kamo brez toih korki,
moji su
u mistu shodjeni,
a ja te još više ljubin.
PUTI H NAN
Od okna do okna
korak
kako da ga je i ni,
zmakne se,
pojde
svako okno
svojin puton
u oči ustaje,
zapameti se nasmih
dovidova niko jutri
eli prija
ko stanemo se
zgor podglavka
skud sve gre
h nan,
samo h nan.
malice
RODI
Zad vrati i okni
lišćepad pripravlja
svoje dohoduće
vrime
a z polja i šume
poje dihi stelje
od trav umeknjene,
svaki grm
svojon lipoton
cvita,
redi trsoroda
zlate se i črne
kapljami bob ukrunjeni,
zuz oganj
u loncu
zvrću se rose, sunca
i duše plodi,
na lako spravljan
tu bogatiju
da za zime
na lito nas spominju,
brez tebe
svi bi plodi rodi
neuživljeni bili.
U HLADU DUŠ
Za spokojne noći
dneva
zad oči diteta
prosvitli ko svitlo
od nikega
življenja,
mir z ruk
čuva ga
kako pod hladon
pina
a usne nonice
siju ljubce
na obraze sanji,
molin te:
– neka čuje se mir
u dihi duš,
beside spravit ću
u pjesmu
za pokle
za jutri
za kad ćeš.
DOMA DOMA
Burin nosi
dihe Vizač
opijaju me
i hodin
po tvojih
shodenih
i neshodenih
korki,
staju se
vrimena
u surinji kamika
povidaju mi
ka me bogica
liči besidami
i smihon duše moći,
na lako šapću
mi korki starinje
kroz travu vode,
na Galvici
gledac šeće
zuz brige i strane,
zdol čuje se
štrmor,
molitva fali
grome spalih spon
sad uzdihle duše
galijota,
sidin na stolici gromače
i zidan poj Histri
doša san doma,doma...
NE NE
Ne, ne
ne želin te
ne želin te
ljubit
samo uvi hip,
već svi vik.
DIMI DUŠE
Nisu mi oči
plačne od dima
vognja,
već od
dima duše,
dušo
moga duha.
KONCI ZVEŽENI
I danas
san bra cviće
slikajuć ga
uz more
grija se u hladu,
a cviti
šapćali su
niku
još ne spišenu pjesmu
ne prolistane knjige
ka zasvitlit će
z tvojih
duše ruk
i kamo
da sad gren?
z nespišene pjesme
i ne štampane knjige
kamo?
samo spat,
lipa i mila van
pjesma sanji
pjesnikinje zlatnih konci
mojih pjesam.
SVITO
Ti na moreš znat
da z naših besid
u raskorku mista
ljube se duše,
na,
sad samo zbudjene
z postelj slušamo
podna zvone
ne za nas,
već zase
da zvona glase
vitru dadju
i reču
kadi svili smo se
u nas.
PITAJU
Pitaju me prijatelji
koj to ženi
krunu z krunon krunin,
kadi je skrivan
zad kih vrati i čuvari
bojćeg hrama,
putaju me jeli tepla meka
tako kako glas moj
kad njoj pjesmu čitan,
pitaju me kadi je nosin
u kin dilo svoga tila,
stili bi da vide
sve te špage i veruge
z kih me
njoja duša spliće,
jedan dan
razgrnut ću sve košulje
poprekidat
sve te špage i veruge
da mi prsa
tilon gola budu,
neka vide neka gledaju
kadi me svojin hladon
hladiš, gladiš
i raspinješ po lipoti
i dobroti svoje duše
krune zgor krun
samo neće,
neće znat
kemu san to spisa?
Vilieli sanju
ZDRHI ISKANJA
U korki ti milina
uvito ziblje želje
mora ljubljenja,
oči moje dihon miluju
sva tvoja skrito neskrita
mista srićnih hipi,
ćutiš li
koliko nan se
zdrhi staju
u volji iskanja
neprohodjenh puti,
u hlad zovu nas
zovi pjesam
z naših tili
nespjevanih,
kad prsti po stožcu
življenja šeću.
KRILO NOĆI
Sad ki hip prija
ču san
zdih i zih
i snje
na prosrtin krilu
postelje, u po puta noći
meka teplinja zove
za spat,
kako,
kega u krilo svit?
išćen cvit molin,
u njemu te zazvat nać
da počine noć.
Laka van noć...
SANJI U SAJI
Unu noć u škurini daž pada
bura tuli
spod nog led naokolo zima, sve use stisla
i škurina kako da je još škurija,
z šume zaša san a na po polja
svitlo jeno malo okno,
stalo je bliže meni i zaplesalo
unako kako da niki maše,
zove dojdi, dojdi,
z već na po promrzlima rukami
potiho potuka san i ču mali glas:
dojdi, samo dojdi,
zad ugnjišćon nonica sidi
krunica leži oganj potiho govori gori,
sve nikako kako da stoji
sija san promišljajuć
koliko je noći zbrojila, ognji zložila
i jutri dočkala, nič mi ne govorii
na glas muči mišljenja mi čuje,
sve ča je i ni u saji dima,
zida, dimljaka piše
u sji čovika i tu piše,
piše u saji, piše u saji,
kad sta san se bi je dan,
krunica leži nonica sidi
bi je dan pred noć
sve sveno krunica, nonica, oganj i saje,
prenu san se ni bi dan samo sanji,
samo saje, samo put svitla
na snigu sanja.
ČUT
Eko sad
na pun trbuh
reć ću ti
da zvizde ne svitle
sporad nas
već sporad ljubljenja,
nis na nebu
ninega iska
ni vidi
a sti san
malo od neba
čuda za se
sti san te
čut vidit ćutit
sti san
ma kako da
nidan ni ču
sti san tebe biš li čula.
