Spominjen se letrati ditinstva iz ocovih just su se rojili mi fameja, kogod iz susidstva pok do kasno u noć bi sedili
To su bile fjabe pasamenta kal oni su mlodi judi bili mladost teška, trudna ma kuntenta slabo jili a cuda cinili
Spominejn se dugih zimsk noći i storiji ol suside Monde obo smihu, šulacu i srići po pećima moje Mole Bonde
Rabotoli vridnije ol celi dokle noć bi kole ogvantala a pri komin kal bi svi poseli iz ociju jubov nji je sjala
Spominjen se stori šjera Tone ca je cvići gojila u latu vroćala je sempre one done obo glodu, nevoji i ratu
Izgubila muža pok unuke a dica se sviton rastorkala bidna soma stavjena na muke a po dvoru uvik je kantala
Fjabe su nestale, nestale krejonce ostali letrati nisu izblidili portile is njima pisme i užonce kada nikad nisu po zemji hodili
Storije se store sal provju u raju svi oni se gore smiju i škercaju a jo njin zafolin strukon friškeg cvića jerbo ‘ti su judi, znali, ca je srića.
Za uhon mu lopiš u skarselin omira španjulet u livu a u desnu bira
Meštar o’ lenjama iz našiga mista dici se lavuron živeć k’o turista
Jerbo kal ga išćeš sila ti je priša na vrota mu piše po brokve son iša’
Ma vej do marende posla se ucini dvi tri kafe padu i pešest pelini
Veltrinu naruciš ma to kantinol je ormarun ti skroji kal komo tukol je
Kal si navar njega i išćeš finece sve ucini treso pok, dobro je, rece
Po obidu uvik hodićo na sponje sila ga islomi velu ćakulonje
A poploni opit kal svi išću di je po dobri užonci paso sve birtije
Mološ mu na voju kako mu je dražje ucini, zagladi i lakon namaže
Tartajun ti doje kal mecak naruciš kus loje ugrodi pri nego dokuciš
Kal hoćeš katridu to bancić izojde naruciš telere svon ponistron dojde
Kal sve vej prigoriš lavur je za pet butilja ol vina stoji u moršet
iz lumbela viri corni rejipet
Jo son višanin i volin Vis njegova poja, barda, moce maslinu, aloj i tamaris mendule, bore i rogoce
Svaki Višanin voli svoj Vis njegovu more, vale, sike žoromod, smokvu, javor i vris lozu, klevondu i planike
Volimo Vis i višku rivu ‘ve store kuće i štitic jata svaku gomilu u stinju sivu is gradel ribu po sri pjata
Jo volin Vis jer cvit je svita liposti take ninder vej ni divnja njegova svaka je lipa oci guštaju, sarce dunji
Vis to je roj, beleca, pisma letrat kakav se ni izvento’ puna je vecer kolica tisna vino se toci a klapa kanto.
Moja klapo kal se noć upoli kal dogori litnjeg‘dnevu žega mi poćemo do skalini moli Kantat tiho rad’ cvita jelnega
Kantat tiho kal zamru šušuri kal se vala ucini u uje u bonaci šoto zlotnih škuri lipu pismu, cvitu, neka cuje
Lipu pismu koja sarcen ruje i opije kada vino bilo u beleci kal svi grod miruje svi ježini trest će njenu tilo
I otu je jutro arevalo hodićol son umidnim ocima još momenat i sve je nestalo i moje se olmolala cima
Hodićol son is tugon u sarcu is potribe, ne kako turista dok’ obloci za vaporon tarcu oprošćon se ol svojega mista
Oprošćon se ol drogih kupanji i ponistru gledon moga cvita svakin dnevon bil son sve to manji sal me ceko torno tujig’ svita
Sve son mogal i sve ucinil son ma sve kada sijol son u siku tujo obist razmeće se Vison a jo nison doškol mi paliku
Hodićol son za svoju nevoju vrotit ću se, bit će alavija jerbo ništo ceko me na škoju molo, lipo, studeno škancija
